Mẫu tìm kiếm

Jenesis 2

Anutunöŋ kendon tarök.

1Giaŋiiga suepkö jakeŋi jakeŋi, gölme aka mietkö yuaiŋiri aködamunŋirambuk pakpak mi lök miwikŋaim eŋgim teköyök. 2*Anutunöŋ nupŋi mi mei teköiga wehön 7 miaŋgöreŋ kendon tarök. Nupŋi pakpak meyöhaŋgöra wehön 7 miaŋgöreŋ luhut meyök. 3Miwimiwikŋai nupŋi pakpak meyöhaŋgöra aka wehön miaŋgöreŋ luhut meyök. Miaŋgöra wehön 7:ŋi mi kendon jiba kötuetköba jim kömbuhiyök. Mewö.

Oyaeŋkoyaeŋ miri qetŋi Eden

4Anutunöŋ suep gölme miwikŋaim etkiiga asuhuyohoraŋgö kösohotŋi mi mewö. Kembu Anutunöŋ suep aka gölme miwikŋaim etkiyöhi, nalö miaŋgöreŋ 5-6Kembu Anutugö jitsihitköra gölme qakŋe kie qahö yöhöiga nup kölkömötköra azi kun kude malökmö, gölme uruŋeyök bedunöŋ miyök kota gölme qakŋi dop köla mem samuruyök. Miaŋgöra arökŋaŋgö ip kösö kun me sombemgö gwözözak yuai kun mi gölmenöŋ qahö asuhum tiŋgita ahöyök.

7*Nalö miaŋgöreŋ Kembu Anutunöŋ gölme sömsöm memba miaŋön azi mem yaköba malmalgö numbu ösumŋi söŋgöröŋe ui geiga öröba guliba malmalgö uŋaŋambuk ahök. Mewö.

8Mewö aiga Kembu Anutunöŋ wehön kotkotŋe göröken miri qetŋi Eden miaŋgöreŋ oyaeŋkoyaeŋ nup kömöta azi miwikŋaiyöhi, i miaŋgöreŋ al waŋgiyök. 9Al waŋgiba jiiga gölmenöhök ip tandökŋini könaŋi könaŋi asuhuba wahötket. Ip mi eksihimŋinambuk aiga ölŋini neneŋi mi nahömŋinambuk. Oyaeŋkoyaeŋ nup bibiŋe malmal köhöikŋaŋgö ipŋi aka mötkutukutugö ipŋi mi mohotŋe jim kutuiga asuhuyohot. Mötkutukutugö ipŋaŋgö könaŋi kewö: Ölŋi nemba miaŋön ölöpŋi aka bölöŋi mietkö könaŋiri mi möt kutubahotpuk.

10Ip mewö wahötketka o töwatŋi kun mi Edenök könahiba oyaeŋkoyaeŋ miri mem kelita miaŋgöreŋök eta jula o böröŋi töwatŋi 4 aka anget. 11O töwatŋi mutukŋaŋgö qetŋi Pison, mi Hawila gölme körek liliköba ahöba anja. Gölme miaŋgöreŋ goul ahöza. + 12Gölme miaŋgö goulŋi mi ölöpŋi kötökŋi akza. Sileqösösök umköhöwakŋambuk qetŋi bedelion aka köt ölŋambuk qetŋi oniks mi mewöyök miaŋgöreŋ ahözahot. 13O böröŋi töwatŋi jaŋgö 2 miaŋgö qetŋi Gihon. Mi (Mesopotemiagö) gölme qetŋi Kus mi körek liliköba ahöba anja. 14O böröŋi töwatŋi karöbutŋi qetŋi Taigris. Mi Asiria gölme wösöŋe wehön kotkotŋe göröken geba anja. O böröŋi töwatŋi jaŋgö 4 miaŋgö qetŋi mi Yufreitis.

15Mewö aiga Kembu Anutunöŋ azi waŋgita oyaeŋkoyaeŋ miri Eden köl kömöta ek galöm akŋapköra jiba al waŋgiyök. 16Al waŋgiba kewö jiba jim kutum waŋgiyök: “Oyaeŋkoyaeŋ nup uruŋe ip pakpak kin anjei, mieŋgö ölŋini mi ölöp amqeba mem nemba malman. 17Mimö, mötkutukutugö ipkö ölŋi mi mönö kude neman. Mi nemba ölöpŋaŋgö könaŋi aka bölöŋaŋgö könaŋi möt kutuman ewö, gi mönö wehön miaŋgöreŋök kömum köhöiman. Miaŋgöra mi mönö kude neman.”

18Mewö jiba Kembu Anutunöŋ jiyök: “Azinöŋ nanŋök maliga ölöp qahö akza. Miaŋgöra nöŋön mönö nanŋi tandökŋaŋgö dop alabaukŋi miwikŋaimam.” 19Mewö jiba arökŋaŋgö sömbupŋi pakpak aka könakembagö neiŋi pakpak mi gölmenöŋ miwikŋaim eŋgiba azigö kösutŋe eŋguaŋgita azinöŋ qetŋini denöwö qetmawi, mi eka mötmapköra yaŋgöreŋ al eŋgiyök. Al eŋgiiga azinöŋ yuai malmalŋinambuk pakpak mieŋgö qetŋini mohok mohok qeriga Anutunöŋ mewö mia ahömapköra jim köhöiyök. 20Mewö aiga azinöŋ mirigö sömbupŋi pakpak, könakembagö neiŋi pakpak aka arökŋaŋgö sömbupŋi pakpak mi qetŋini eŋgim teköyök. Eŋgim teköyökmö, nanŋi tandökŋaŋgö dop alabaukŋi malmapköra kun qahö miwikŋaiyök.

21Qahö miwikŋaiiga Kembu Anutunöŋ mi eka azi mem lömböriiga gaun lömbötŋi ahöyök. Ahöiga maröm sihitŋi kun öröba dumdumŋi busuŋan mem gwözöŋnök. 22Gwözöŋda azinöhök maröm sihitŋi meyöhi, miaŋön ambi meyök. I memba azigöreŋ waŋgita kayök. 23Waŋgita kaiga azinöŋ i eka kewö jiyök:

“Yei! Ki nani tandöha. Yaŋgö sihit busuŋi mi nani sihit busunöhök asuhuza.

Anutunöŋ i azigö sile kitipŋeyök mei letota azi tandök ewö maljawaŋgöra qetŋi mönö ambi (azigö alaŋi) qetme.+

24Mewö jiiga Anutunöŋ kewö jim kutum etkiyök: “Mewö aiga azinöŋ mönö iwinamŋi etkömosöta anömŋaŋgöreŋ qekötahöba silemohot aka malmahot.”

25Azi miaŋön anömŋambuk opo söröŋiri qahö aukŋe malohotmö, töndup nanŋiraŋgö gamuŋiri qahö möta malohot. Mewö.

Urumeleŋgö Buŋa Kimbi Jöhöjöhö Dölökŋi

© 2013, Wycliffe Bible Translators, Inc. All rights reserved. More Info | Version Index