Mẫu tìm kiếm

Genesis int

Onà Besahen

Se kelebadan te kagi “Genesis,” keteboan. Se libro seini tepad te keteboan te kedita, pengkey doton te langit aw dini te keneyonan, keteboan te menge otaw, aw keteboan te menge keepoan i Israel.

Lekat diyà te egnà ono (1) lamig doton te egnà onsi (11), mebasa se tepad te peg-inang te Timanem te keneyonan aw menge otaw. Seini se indan tepad ki Adam aw ki Eva, tepad ki Cain aw ki Abel, tepad ki Noe aw peglaneg te tanà, aw tepad te melangkaw balay te Babel.

Lekat diyà te egnà sempolò teg dowa (12) lamig doton te egnà singkwinta (50), mebasa se tepad te menge kemonaan te menge Judio. Si Abraham se nedengeg tandà te pegsalig din te Timanem, aw pegtoman din te menge punù te Timanem. Si Abraham se amay i Isaac, aw si Isaac se amay i Jacob. Si Jacob se eg-ingedanan ki Israel. Se sempolò teg dowa (12) menge batà meama i Jacob (Israel), sìyan se eglekatan te sempolò teg dowa (12) menge pongan te menge keepoan i Israel. Si Jose batà i Jacob se neinang gobirnador doton te Ehipto. Yan minalin si Jacob aw kedita te keepoan din doton te Ehipto.

Egpetaga-taga se libro seini tepad te Timanem. Sikandin se mig-inang te langit aw keneyonan. Dakel se pedowan din diyà te menge otaw. Sikandin se eg-allad aw egtabang te menge otaw, aw sikandin se meg-okom aw meg-pelumun te menge eg-inang te medaet.

Se kaling peokit

© 1982, Wycliffe Bible Translators, Inc. All rights reserved. More Info | Version Index